Ich bin Yannick Hendrikx, unne zoeën van Jan van Theu van Hooke Harrie, en van Mariza van ’t typmachine wînkelke oppe Maaspoort/Remundsjeweeg vreuger. Ich bin 29 jaor joonk, en bin geboeëre en getoôge op Luuëke. Ich heb ein breurke en det és Mitchel, ein van mien adjudânte. Ich bin chauffeur beej Wiermans aod pepeer, en zoeë aaf en tôw beej Jack’s pub te vînge achter de tap.

Mien hobby’s zeen boeëtenum ’t opstap gaon auch nog voetbâl. Zoeë bin ich auch trainer en leider van de B1 beej de schoeënste voetbâlklub van Wieërt: DESM oftewaal de Moeësdiêk. Aaf en tôw daon ich dao auch hellepe inne katiên, waat ich gaer daon, auch al èsj soms waat vreug. Met dees daag daon ich sâme met Maikel optreije as de Wieërter dikke en de dunne neet te vergaete. En bin ich auch al jaore op paad met VV Gekkewêrk.

Ich heb mien devies bedachtj oëver mien wêrk beej Wiermans en un aod Wieërts gezagdje, en det es…: MET DEES DAAG REEJ ICH GEIN PEPEER, MER 3 DAAG FLÎNK DE BAER! ALAAF

Mien ôngerscheijing heb ich ’t volgendje van gemaaktj. Unne kombinatie van mien vrachtwagen, voetbal en Gekkewêrk.