Vör de mînse di-j mich nog neet kinne, zal ich mich efkes vuuërstelle.
Ich bin Paul Geurts, 43 jaor gelieëje geboeëre in Putten. Ich bin (un)ne zoeën van Henk Geurts en Edith Schreuders, dochter van aod Kolonel Schreuders vanne KMS in Wieërt.
Same met mien twieë gebreurs Mike en Rick vanaaf mien tieëndje getoeëge op Luuëke, beej ’t baasketbalveldje oppe Eburonenhof op Luuëke.
Nao (un)ne verpli-jchte uuttreî-j nao Breda, wis ich neet wi-j rap ich trök mós kaome nao Wieërt um ternao noeëts mieër vertrékke uut Wieërt.

Mien vrâwke, Joëlle Steuten kuumptj uut (u)n echte Preensefemiêlie, mien schoeënpap én schoeënbroor zeen Preens gewaesj beej de Verkûsköp. Same met Joëlle heb ich twieë wichter, Chavi van tieën en Dano van zés jaor aod.

Woeë zoeëjdje mich van kunne kinne?
Dînkdje noow, dae dikke möttert kuumptj mich êrges bekindj van vuuër, dan zooj dét kinne zeen van:
– Vreuger uutgaon oppe Oele beej de Carte Blanche
– Meschien van ’t voetbalveldj of vanne zaal
– Of vanne Free Record Shop woeë ich aojerwéts plaetjes verkoch én un bitje housemeziek drejdje oppe dónderdigaovundj
Óf es het toch dae leenk met deej auto’s? Ieërder beej van Mossel in Wieërt, mér tieëgeswoeërdig as vestigingsmanager beej autobedriêf Hedin in Sittard vuuër de mêrke Renault, Dacia en Nissan.

Naeve ut verdeêne van mien cênte, kiek ich inne wiekende gaer nao de Formule ein en Max Verstappen. Auch bin ich (un)ne vaste bezeuker van de schoeënste club uut Eindhoven, PSV.
Met vrindje haoj ich nog stieëds van haole klot, waat pilskes happe, völ zeîvere en plaetjes drejje op hoêsfieëste.
Auch prebieër ich as trainer de joonkste talenten in ut gael/zwert klaor te stoume, want de jeugd hieët de toekomst.
Verder dreenk ich gaer un pötje beer tiêdes de dêrdje helft inne hoêskamer van DESM, woeë ich dit jaor gedebutieërdj bin in ’t ieërste vanne Veteranen.

Dit brîngtj mich tot mien medalie/oongerscheî-jing:
De orde van ’t luî-j nummerke tieën!
Dét es vörâl umdet ze zégke dét ich neet uut de middencirkel kom tiêdes ut voetballe.
Vastelauvondj vere doon ich neet allein, dit doon ich same met mien geweldjige adjudante en hun gezînne, deej ich noow gaer aan uch allemaol wil vuuërstelle:

• Mien broor Mike Geurts, same met zien vraw Anita en hun dochters Jaimy, Danique en Giovanna
• Mien schoeënbroor Wesley Steuten, same met zien vraw Bonnie en de wichter Shania en Davino. Wesley woor preens van V.V. de Verkûsköp in 2019, mér dits kieër in de kleuren van V.V. Vreug of Laat. Noow zeen de rolle nét un bitje umgedrej-dj….van adje nét neet in 2019 nao Preens van Vreug of Laat 2025, weem haaj dét gedacht-j?
• Miêne kammeraod Dave van de Vin, same met ziêne partner Alex Moors en hun wichter Sofie en Max
• Miêne kammeraod Tom Kneepkens met ziêne partner Sharon Janssen en hun wichter Demi en Jari.

Dit jaor gaon ve der un topfieëst van make met V.V Vreug of Laat én dét doon ich oonger mien devies:

Met dieës daag neet luî-j of meug, mer fieëste tot mêrgevreug!